நெற்றி புரளும் கேசம், நேர்மை நிறைந்த சுவாசம் 

எங்களை- நெஞ்சில் சுமந்த பாசம்

அன்பு,அறம்…நேசம் – ஐயா,

உங்கள் நினைவை பேசும்- இன்று 

இழந்து நிற்குது நம் தேசம்.

ஆய்வே வாழ்வென்று இருந்ததால்- உங்களை 

ஓய்வே வந்தழைத்துச் சென்ற நாள்

உங்கள் சொல் கேட்டு,

மேகம் வழியனுப்பி கலம் விண்வெளி அடைந்தது – சாதனை 

மேகாலயம் வழியனுப்பி கலாம் விண்வெளி அடைந்தது -வேதனை

வியப்பானதொரு விநோதக் கலவை நீங்கள்

அறிவுசால் அணு விஞ்ஞானி

அழகு மொழி கவி மெய்ஞானி!

உங்கள் கலம் விண் தொட்டது

உங்கள் கரம் மரக்கன்று நட மண் தொட்டது!

அன்று பதவியால்- முதல் இந்தியக் குடிமகன் 

செய்த உதவியால் – எங்கள் இல்லத் தமிழ் மகன்

மெல்ல அசைந்தது உங்கள் அக்கினிச் சிறகு

ஒவ்வொரு சொல்லுக்கும் இசைந்து மலர்ந்தது மனது 

ஐயா, கற்றலும், கற்பித்தலும் – கடமை என்றீர்கள் 

உறங்கவிடா கனவே – எங்கள் உடமை என்றீர்கள்

இங்கு பல சிந்தனைகளை விதைத்துச் சென்றீர்கள் 

இந்த நூற்றாண்டு, இளைஞர் மனதை வென்றீர்கள்!!